England: Sesko hetja Man Utd í dramatískum sigri

Fulham fékk dauðafæri snemma leiks þegar Joachim Andersen fleytti boltanum í átt að marki af stuttu færi en Senne Lammens varði frábærlega.

Stuttu síðar var dæmd vítaspyrna á Fulham þegar Jorge Cuenca braut á Matheus Cunha. Atvikið var skoðað í VAR og niðurstaðan var sú að brotið var fyrir utan teiginn og aukaspyrna dæmd. Bruno Fernandes átti fyrirgjöf úr aukaspyrnunni og Casemiro skallaði boltann í netið og kom Man Utd yfir.

Cunha bætti síðan öðru markinu við snemma í seinni hálfleik. Cuenca hélt að hann hefði minnkað muninn um tíu mínútum síðar en það var naum rangstaða í aðdragandanum og markið dæmt af.

Þegar skammt var til loka venjulegs leiktíma var Harry Maguire dæmdur brotlegur inn í teig og vítaspyrna dæmd þar sem Raul Jimenez skoraði af miklu öryggi og minnkaði muninn.

Brasiilíumaðurinn Kevin jafnaði síðan metin í uppbótatíma með glæsilegu marki en hann átti skot frá vinstri og boltinn söng í fjærhorninu.

Níu mínútum var bætt við venjulegan leiktíma og þegar fjórar mínútur voru komnar fram yfir venjulegan leiktíma tryggði Benjamin Sesko dramatískan sigur Man Utd.

Uppbótatíminn var mikill í leikjum dagsins en það voru tíu mínútum bætt við þegar Brentford heimsótti Aston Villa.

Kevin Schade fékk að líta rauða spjaldið undir lok fyrri hálfleiks fyrri að sparka í bringuna á Matty Cash þegar þeir voru í einhverjum kíting.

Þrátt fyrir að vera manni færri komst Brentford yfir þegar Dango Ouattara skoraði úr þröngu færi.

Tammy Abraham var í byrjunarliði Aston Villa í fyrsta sinn eftir komuna frá Besiktas á dögunum og hann kom boltanum í netið snemma í seinni hálfleik en markið var dæmt af.

Eins og fyrr segir var tíu mínútum bætt við en fleiri mörk urðu ekki skoruð og því sterkur sigur Brentford staðreynd.

Morgan Gibbs-White kom Nottingham Forest yfir gegn Crystal Palace snemma leiks.

Undir lok fyrri hálfleiks fékk Neco Williams rautt spjald fyrir að verja boltann með hendinni á línu, hvaða markvörður sem er hefði verið stoltur af þessari vörslu.

Ismaila Sarr, sem var fremstur hjá Palace í fjarveru Jean-Philippe Mateta, steig á punktinn og skoraði.

Hvorugu liðinu tókst að ógna markinu af einhverju viti í seinni hálfleik og jafntefli því niðurstaðan.

Manchester Utd 3 - 2 Fulham
1-0 Casemiro ('19 )
2-0 Matheus Cunha ('56 )
2-1 Raul Jimenez ('85 , víti)
3-1 Benjamin Sesko ('90 )
3-2 Kevin ('90 )

Aston Villa 0 - 1 Brentford
0-1 Dango Ouattara ('45 )
Rautt spjald: Kevin Schade, Brentford ('42)

Nott. Forest 1 - 1 Crystal Palace
1-0 Morgan Gibbs-White ('5 )
1-1 Ismaila Sarr ('45 , víti)
Rautt spjald: Neco Williams, Nott. Forest ('45)