Carrick: Stórt skref fyrir okkur

United-menn lentu marki undir í fyrri hálfleik en komu til baka í þeim síðari með vítaspyrnumarki Bruno Fernandes og sigurmarki slóvenska framherjans Benjamin Sesko.

„Ég er ótrúlega ánægður. Þetta var ákveðið próf fyrir okkur að lenda marki undir í hálfleik. Það er nýtt fyrir okkur. Við byrjuðum leikinn ekkert frábærlega og verð ég að hrósa Palace. Við náðum að vinna okkur inn í leikinn er leið á hálfleikinn og svo stigum við upp í seinni.“

„Það var mjög stórt að koma til baka eftir að hafa lent undir á heimavelli svona snemma gegn liði sem er erfitt að brjóta á bak aftur. Stórt skref hjá okkur og var ég ánægður með hvernig strákarnir nálguðust og brugðust við þessu,“ sagði Carrick.

Sesko hefur verið sjóðandi heitur með United en hann var að gera áttunda deildarmark sitt fyrir félagið.

„Ben er hér til að skora mörk og hann hefur gert nóg af því upp á síðkastið. Hann á eftir að reynast Man Utd mjög mikilvægur og er þegar orðinn það. Hann á eftir verða enn mikilvægari eftir því sem hann þroskast og bætir sig,“ sagði Carrick.

Man Utd er í 3. sæti deildarinnar með 51 stig og gerir sér vonir um að komast aftur í Meistaradeildina á næstu leiktíð.