England: Leeds fór langt með að gulltryggja sætið sitt

Leeds fór langt með að gulltryggja áframhaldandi veru í úrvalsdeildinnii þegar liðið vann Burnley á heimavelli í kvöld.

Burnley féll formlega úr deildinni þegar liðið tapaði gegn Man City í síðustu umferð. Leeds er níu stigum frá fallsæti þegar þrjár umferðir eru eftir.

Leeds náði forystunni snemma leiks þegar Anton Stach skoraði með góðu skoti fyrir utan teiginn. Það var eina markið í fyrri hálfleik en Noah Okafor bætti öðru markinu við eftir laglegan undirbúning Dominic Calvert-Lewin og Jayden Bogle.

Calvert-Lewin átti hælsendingu á Bogle og hann sendi boltann fyrir og Okafor mætti og skoraði.

Calvert-Lewin gerði svo gott sem útum leikinn stuttu síðar. Burnley beit frá sér í kjölfarið og Lucas Pires skoraði mark sem var dæmt af vegna rangstöðu en stuttu síðar klóraði Loum Tchaouna í bakkann en nær komust þeir ekki.

Leeds er í 14. sæti með 43 stig, níu stigum á undan Tottenham sem á leik til góða. Leeds heimsækir Tottenham í næstu umferð og gæti endanlega tryggt sætið sitt í deildinni eftir þann leik. Burnley er í 19. sæti með 20 stig og er þegar fallið eins og fyrr segir.