Jóhann Birnir ósáttur með rauða spjaldið - „Fannst hann bara sækja brotið"

Í fyrri hálfleik gekk allt á afturfótunum hjá ÍR þar sem þeir fá rautt spjald, skora sjálfsmark og svo eru stór markmanns mistök í öðru marki Þróttara.

„Svona er bara fótboltinn, gekk allt up í síðasta leik og núna fengum við aðeins að kenna á því. Það eru bara mistök sem kosta okkur mark, það er bara leiðinlegt," sagði Jóhann.

Ágúst Unnar Kristinsson fær rautt spjald á 18. mínútu fyrir að brjóta og stöðva upplagt marktækifæri. Jóhann var hins vegar ekki alveg viss um dóminn.

„Þetta var bara klókt hjá honum, mér fannst hann í rauninni bara sækja brotið. Hann gat ekki annað en gefið honum rautt fyrst að hann dæmdi, en mér fannst hann bara vera að reyna að láta brjóta á sér. Mér fannst Gú (Ágúst) bara vera að reyna að hleypa honum fram hjá sér, þá bara stoppar hann og lætur hann fara á sig. Ekkert hægt að segja við því," sagði Jóhann.