England: Frábær sigur Sunderland í nýliðaslag

Sunderland vann öruggan 3-0 sigur á Burnley í nýliðaslag í 24. umferð ensku úrvalsdeildarinnar á leikvangi ljóssins í kvöld.

Habib Diarra, sem kom inn í byrjunarliðið fyrir þennan leik, átti frábæran leik. Hann átti stóran þátt í fyrsta markinu á 9. mínútu er skot hans fór af Axel Tuanzebe, varnarmanni Burnley, og breytti um stefnu. Markvörðurinn Martin Dubravka var farinn í hina áttina og átti því aldrei möguleika á að verja.

Diarra var aftur á ferðinni á 32. mínútu leiksins. Eftir frábæran spilkafla kom boltinn inn á teiginn, datt af varnarmanni Burnley og út á Diarra sem þrumaði boltanum í netið. Allt rosalega óheppilegt hjá Burnley í þessum leik.

Sunderland var mun betri aðilinn í leiknum og verðskuldaði þriðja markið sem Chemsdine Talbi gerði á 72. mínútu með frábæru skoti fyrir utan teig sem hafnaði í þverslánni og inn.

Sannfærandi hjá Sunderland sem vann 3-0 sigur og er nú í 8. sæti með 36 stig en Burnley áfram í næst neðsta sæti með 15 stig.