Íslenska kvennalandsliðið mætir ríkjandi heimsmeisturum Spánar í undankeppni HM 2027. Leikurinn hefst klukkan 18:00 á morgun á Estadio Municipal Castalia vellinum í Castellon. Næstkomandi laugardag verður svo leikið gegn Evrópumeisturum Englands.
Fotbolti.net ræddi að því tilefni við landsliðskonuna Hlín Eiríksdóttur í gær. Hvernig leggst verkefnið í hana?
„Mjög vel, mjög spennt að spila þessa leiki og líka bara gaman að vera komin hingað í landsliðið aftur. Það er hálft ár nánast sem við spiluðum með landsliðinu síðast þannig það er mjög gaman. Krefjandi og skemmtilegt verkefni í stórri keppni sem við ætlum að gera mikið í. Þannig að já mjög gaman.“ Svaraði Hlín
„Þetta verða erfiðir leikir og það vita allir að þessi lið eru hærra skrifuð en við erum. Þannig við komum að því leytinu til pressulausar inn í leikinn. Sem getur örugglega verið gott en við erum búin að fara vel yfir Spán núna. Sjáum alveg möguleika á móti þeim. Hvar við getum refsað þeim þegar við höfum boltann og svo þurfum við auðvitað að spila varnarleikinn vel.“
Mikið hefur verið í umræðunni sú ákvörðun KSÍ að síðasti landsliðsgluggi hafi ekki verið nýttur í undirbúning og minni tími til undirbúnings í þessu verkefni er þetta eitthvað sem leikmenn ræða saman um innan hópsins?
„Ekkert eitthvað, það eru engar skipulagðar umræður um þetta sko en þú veist, þetta berst kannski alveg til tals og þetta var ekki gott. Ég held að við leikmenn hefðum allar viljað hafa glugga.“
Hvernig var ferðalagið og annar undirbúningur?
„Fyrir mig persónulega var það bara einfalt, ekki langt að fara frá Ítalíu og við erum bara hér á Spáni í einhverja 6-7 daga, mjög næs. Góðar aðstæður hér, mjög góður völlur og getum labbað á æfingu bara. Svo erum við reyndar að fara erum að ferðast á morgun (í dag) á leikstað. Það er nýtt, eitthvað sem við höfum ekkert verið mikið að gera í verkefnum en það er allt bara í mjög góðu standi hérna.“
Viðtalið í heild má finna í spilaranum hér að ofan
