Myndband: Hlín með gjörsamlega frábært mark

Þær Hlín Eiríksdóttir, Guðný Árnadóttir og Katla Tryggvadóttir voru allar á sínum stað í byrjunarliði Kristianstad sem tók á móti Djurgården í næstsíðustu umferð sænsku deildarinnar í dag.

Kristianstad vann leikinn, 3-1, og komu öll mörkin í seinni hálfleik. Hlín skoraði fyrsta mark leiksins á 53. mínútu eftir magnaðan einnleik. Hún fékk boltann úti vinstra megin við teiginn, fór illa með varnarmann Djurgården í tvígang, tók gabbhreyfingu á næsta varnarmann og smellti svo boltanum í netið með skoti utarlega úr teignum. Markið má sjá hér neðst.

Djurgården jafnaði metin á 64. mínútu en Kristianstad komst aftur yfir á 80. mínútu. Eftir gott samspil á hægri vængnum átti Guðný flotta fyrirgjöf út í vítateiginn hjá Djurgården og þar var Tilda Persson sem skoraði með góðu skoti.

Í uppbótartíma var svo brotið á Hlín inn á vítateig Djurgården og Mathilde Janzen innsiglaði sigurinn með marki úr vítaspyrnunni.

Hlín hefur verið funheit að undanförnu og var þetta hennar sjötta mark í sjö síðustu leikjum með Kristianstad. Liðið endar í 4. sæti í deildinni, nokkuð frá því að ná í Evrópusæti og vel fyrir ofan 5. sætið.