Arteta vonsvikinn - „Ég hef aldrei séð annað eins"

Cristiano Ronaldo skoraði tvisvar fyrir United í leiknum, það síðara úr vítaspyrnu.

„Það er eins og það er. Ef þú færð á þig þrjú mörk á Old Trafford þá er erfitt að ná í úrslit. Ég var vonsvikinn með mörkin sem við fengum á okkur."

„Við höfum náð langt síðan við töpuðum á Anfield. Við náðum betri köflum í leiknum í lengri tíma. Þegar við vorum við stjórn þá var betri strúktúr og við sköpuðum færi. Þegar staðan var 2-2 þá þurftum við byggja þennan skriðþunga til að ná í sigurinn."

„Það var margt sem ég var ánægður með úr leiknum. Ég var ánægður með hegðun einstaklinga. Þegar þú skorar tvö mörk á Old Trafford þá býst maður við því að fá eitthvað úr leiknum og það er ákveðin eftirsjá en það er okkur að kenna. Þegar þú horfir á leikinn þá væri hægt að segja að við ættum meira skilið en svona gerist gegn gæðamiklum mótherja."

Arteta var spurður út í fyrsta mark leiksins. David De Gea, markvörður United, lá óvígur í markinu eftir að Fred steig á ökklann á honum og nýtti Emile Smith Rowe sér því tækifærið og skaut á markið.

„Ég hef aldrei séð annað eins. Þetta er ákvörðun dómarans og VAR skoðaði þetta líka og þetta var dæmt gott og gilt," sagði hann í lokin.

Arsenal er þrátt fyrir tapið í 5. sæti deildarinnar með 23 stig, tveimur stigum á undan Manchester United sem er í 7. sæti.