ÍBV tapaði gegn Breiðabliki í Eyjum í dag 2-1 eftir að hafa komist yfir strax á fyrstu mínútu. Fótbolti.net ræddi við Sigurð Arnar Magnússon, fyrirliða Eyjamanna, eftir leikinn.
Lestu um leikinn: ÍBV 1 - 2 Breiðablik
„Er svekktur að tapa. Það var orka í okkur í byrjun leiks og við vorum að berjast fyrir hvorn annan. Fúlt að við fáum ekkert út úr því," sagði Sigurður Arnar.
„Ef við spilum svona tökum við einhver stig í sumar. Við þurfum samt að skerpa á ákveðnum hlutum, mörkin sem við fáum á okkur eru ódýr og við megum gera betur í ákveðnum stöðum sem við komumst í. Grunnvinnan var í lagi og þetta var ágætis leikur."
Eyjamenn spila mikið út frá markmanni og Sigurður Arnar hefur gríðarlega mikla trú á hugmyndafræðinni.
„Ég held að við ættum að gefa þessu tíma og við þurfum að hafa trú á þessu, fólkið í kringum félagið og leikmennirnir. Við sáum að þetta gekk ekki upp í fyrstu hjá Víkingunum og svo þegar þetta small þá heldur betur small þetta," sagði Sigurður.
„Þetta gekk ekki hjá KR í fyrra svo small þetta. Þeir höfðu trú á verkefninu allan tímann og stóðu með þjálfurunum og leikstílum og eru að uppskera eftir því núna. Við erum kannski ekki að fara sömu leið en svipaða. Stundum lítur þetta illa út en við þurfum að hafa trú á þessu. Ef ekki í sumar þá kannski á næsta ári eða ári eftir það. Ég hef trú á þessu og við þurfum bara að halda áfram."
