Sara Björk á skjánum á Picadilly Circus
Picadilly Circus-torgið í Lundúnum er eitt vinsælasta kennileiti borgarinnar og mikið heimsótt af ferðamönnum á hverju ári en Hafliði Breiðfjörð, framkvæmdastjóri Fótbolta.net, sá kunnuglegt andlit er hann leit upp á risaskjá sem stendur á torginu.
Evrópumót kvennalandsliða hefst í kvöld með leik Englands og Austurríki.
Mótið hefur fengið mikla umfjöllun til þessa og hafa styrktaraðilar auglýst það vel um allt land.
Hafliði var á göngu í Lundúnum er hann leit upp og sá þar risaskjá á Picadilly Circus en þar mátti sjá auglýsingu frá kortaframleiðandanum VISA, sem er stoltur styrktaraðili Evrópumótsins.
Íslenska landsliðskonan Sara Björk Gunnarsdóttir fékk að njóta sín þar í landsliðsbúningnum.
Hann þótti nú eitthvað kannast við þessa mynd af Söru en hann tók einmitt myndina í leik Íslands við Serbíu í mars fyrr á þessu ári.
Íslenska landsliðið hefur leik á EM á sunnudag gegn Belgíu.
Ég hef átt ljósmyndir í öllum stærstu dagblöðum Englands en mér fannst svolítið meira töff að standa á Piccadilly Circus í kvöld og sjá ljósmynd sem ég tók á þessum risa stóru skjám sem eru á torginu. Mynd af Söru Björk sem ég tók í leik hjá Íslandi í Serbíu í mars. #fotboltinet pic.twitter.com/Gatxe5g9cd
— Hafliði Breiðfjörð (@haflidib) July 5, 2022
Athugasemdir
