Arnar Gunnlaugsson
Pablo Punyed verður ekki með
Arnar Gunnlaugsson, þjálfari Víkings, segir að liðið megi ekki sýna snefil af minnimáttarkennd þegar liðið mætir Borac frá Bosníu í Sambandsdeild Evrópu á morgun.
Víkingsliðið fer ágætlega af stað í Sambandsdeildinni en liðið varð það fyrsta í Íslandssögunni til þess að sækja sigur í keppninni er það vann Cercle Brugge í síðustu umferð.
Liðið er með þrjú stig eftir tvo leiki og stefnir að því að sækja annan sigurinn á morgun.
„Ég met möguleikana mjög góða og ég byggi þá skoðun á að við höfum verið öflugir á heimavelli undanfarin ár í Evrópukeppnum og náð í nokkur sterk og öflug úrslit. Við höfum gefið liðum góðan leik, þannig ég met það að möguleikar okkar eru sterkir,“ sagði Arnar við Fótbolta.net.
Borac er ríkjandi deildarmeistari en titillinn var sá þriðji í sögu félagsins.
Bosníska liðið náði í óvænt stig gegn Panathinaikos í fyrstu umferðinni og vann síðan APOEL frá Kýpur í síðustu umferð, en Arnar ræddi aðeins um andstæðinginn.
„Mikil þekking í þessu liði. Þeir virðast kunna alla þætti leiksins mjög vel og eru ófeimnir við að sýna þá hvort sem þeir eru á útivelli eða heimavelli. Ég á von á að þeir verði frekar varfærnislegir á morgun. Þeir eru komnir með fjögur stig og jafntefli fyrir þá á erfiðum útivelli væru ekki slæm úrslit. Hafandi sagt það reyna þeir náttúrulega að vinna leiki og eru með skeinuhætta leikmenn og góða leikmenn innanborðs. Þetta er á þessu 'leveli' í keppninni og miðað við úrslitin sem þeir hafa ná í undanfarið þá megum við ekki sýna einn snefil af minnimáttarkennd og fókusleysi ef við ætlum að fá eitthvað úr þessari viðureign.“
Veðurspáin segir að það verði rok og rikning á höfuðborgarsvæðinu, sem gæti hentað Víkingum ágætlega.
„Það hjálpar okkur oft upp á Skaga en ég hef alltaf tönnlast á því síðustu fimm eða sex ár að ef þu ætlar að vinna Íslandsmeistaratitilinn þá verður þú tilbúinn í hvaða aðstæður sem er. Það böggar okkur ekki neitt en mögulega gæti það böggað þá. Ég þekki ekki almennilega hvernig aðstæður þeir fá yfir háveturinn í sínu heimalandi en ég efast um að þeir fái svona mikið rok þannig auðvitað reynum við að nýta okkur það. Maður finnur að sumir af þessum leikmönnum sem koma að spila Íslandi á þessum tímapunkti, hvort sem þeir eru að spila á móti okkur eða í landsleikjum, að þetta sé ekkert uppáhalds staðurinn til að spila á í nóvember þannig við þurfum að nýta okkur allt sem hægt er.“
Þá fór Arnar yfir stöðuna á leikmannahópnum en það eru bæðir góðar og slæmar fréttir.
„Valdimar er ekki klár en hann er byrjaður að æfa nokkuð vel og verður klár fyrir Armeníu-leikinn. Pablo er ekki með, sem eru náttúrlega ekki góðar fréttir, en góður fréttirnar eru þær að Oliver og Matti eru að fá auka viku eða tíu daga til að testa sig og þeir líta betur og betur út.“
Tölfræðisnillingar tala um að það þurfi sjö stig í deildarkeppni Sambandsdeildarinnar til að komast í úrslitakeppnina. Er stefnan sett þangað?
„Klárlega. Það væri mjög þægilegt — ég viðurkenni það. Eftir leikinn á morgun að okkur takist að ná í þrjú stig og vera komnir með sex stig og þurfa mögulega eitt stig í næstu þremur leikjum, þrátt fyrir að það séu nógu erfiðir andstæðingar, þá ætti eitt stig að duga og það væri þægileg tilfinning. Ég held að það sé óhollt að fara fram úr sjálfum þér en allt í lagi að leyfa sér að dreyma. Þetta er fyrst og fremst góð gulrót fyrir leikmenn og klúbbinn að gera allt sem í okkar valdi stendur til að innbyrða þessi þrjú stig,“ sagði Arnar í lokin.
