Sigurður Ragnar Eyjólfsson
„Við vorum 2-0 yfir og vorum að spila mjög vel og með leikinn í hendi okkar þegar Maggi fær sitt annað gula spjald. Mér fannst þetta svona frekar soft og hann fær gult fyrir fyrsta brotið sitt í leiknum. Það er vendipunktur í leiknum og við sjáum fram á að spila manni færri í 60 mínútur í leiknum.“ Sagði Sigurður Ragnar Eyjólfsson þjálfari Keflavíkur um leikinn og ákvarðanir Ívars Orra Kristjánssonar dómara leiksins eftir 3-3 jafntefli Keflavíkur við ÍBV í dag.
Lestu um leikinn: Keflavík 3 - 3 ÍBV
Sigurður var ekki hættur að ræða málefni dómgæslu í leiknum en Keflvíkingar voru ósáttir við nokkur atriði þar sem þeim fannst á sig halla.
„Við' fáum á okkur mark sem mér fannst ólöglegt. Það átti að vera aukaspyrna í aðdragandanum, bæði úti á kanti þegar Patrik er sparkaður niður. Svo kemur fyrirgjöf og uppúr því skot þar sem leikmaður er í rangstöðu hjá þeim sem stendur beint fyrir Sindra og hefur áhrif á leikinn.“
Ivan Kaliuzhnyi lék sinn fyrsta leik fyrir Keflavík í dag. Um frammistöðu hans sagði Sigurður.
„Mér fannst hann mjög góður. Hann kom frábærlega inn í þetta í dag. Hann hefur ekki spilað leik frá því í febrúar en maður sá gæðin sem hann kemur með inn í liðið okkar. Finna sendingar, staðsetningar og góð barátta í honum og bara hörkuspilari.“
Sagði Sigurður en allt viðtalið má sjá hér að ofan.
