„Mér fannst þetta fínn leikur og við spiluðum okkar upplegg. Mjög „physical" og góður leikur" segir Úlfur Ágúst Björnsson, leikmaður FH í Bestu deild karla, eftir 1-1 jafntefli við Stjörnuna þar sem hann skoraði eina mark Hafnfirðinga.
Lestu um leikinn: FH 1 - 1 Stjarnan
FH byrjaði leikinn betur áður en Stjarnan vann sig inn í leikinn í fyrri hálfleiknum. FH tók svo aftur stjórnina í seinni hálfleik.
„Það komu kaflar í leiknum þar sem bæði lið taka yfir. Við spiluðum góðan leik og hefðum átt að nýta þau færi sem við fengum. "
Bæði lið fengu víti í fyrri hálfleik og hægt er að setja spurningarmerki við báða dómana hjá Helga Mikael Jónassyni dómara leiksins.
„Ég sá ekki alveg vítið hjá Stjörnunni og ég spurði nokkra Stjörnumenn út í það og þeir sögðust ekki heldur hafa séð þetta. Björn Daníel var bara tekinn niður og mér fannst það víti en ég veit ekki alveg með hitt vítið, ég þarf að sjá það betur."
Úlfur skoraði stórglæsilegt jöfnunarmark þegar hann setti boltan yfir Árna Snæ í markinu sem stóð mjög framarlega.
„Ég vissi að hann myndi vera framarlega. Hann er sweeper keeper og góður í því. Matti (Mathias Rosenorn) sagði mér fyrir seinni hálfleikinn að vindurinn væri með okkur og ég ætti bara að prófa að skjóta og reyna á hann. Ég reyndi og sem betur fer fór hann inn."
Athugasemdir
