Hannes Þór Halldórsson var kynntur sem nýr markvörður Vals í dag. Landsliðsmarkvörðurinn ræddi við Fótbolta.net á Hlíðarenda.
Viðtalið má sjá í heild sinni í sjónvarpinu hér að ofan en þar var Hannes meðal annars spurður að því hvaða áhrif þessi skipti hefðu á landsliðsferil hans.
„Ég hef engar áhyggjur af því að þetta muni hafa einhver áhrif á spilamennsku mína með landsliðinu. Ég er betur settur spilandi hér en að vera á bekknum í Aserbaidsjan. Þetta var erfiður tími að vera ekki að spila. Um leið og ég finn gleðina þá kemur restin af sjálfu sér," segir Hannes.
„Fyrir mér snýst þetta fyrst og fremst um að vera í standi, vera með sjálfstraust og vera að spila. Ég hef alltaf haft tilfinningar til íslensku deildarinnar og hlakkað til að koma til baka. Nú upplifi ég þann draum að vera atvinnumaður í fótbolta á Íslandi, í mínu umhverfi og í minni borg með mitt fólk í kringum."
„Ég er rosalega spenntur. Það er stóra málið að maður sé ánægður. Ég hef mín markmið með landsliðinu og eins og aðrir landsliðsmenn ætla ég á Evrópumótið og spila þar."
Viðtalið má sjá í heild í sjónvarpinu hér að ofan.
Athugasemdir