Landsliðskonan og varnarnaglinn, Guðrún Arnardóttir, segir íslenska landsliðið spennt fyrir komandi heimaleikjum gegn Úkraínu og Englandi og telur verkefnið leggjast vel í hópinn.
„Þetta leggst bara mjög vel í mig. Það er gaman að vera komnar saman aftur. Þetta verða mögulega aðeins ólíkir leikir en ég er spennt fyrir þeim báðum og hlakka til að fá að spila,“ sagði Guðrún þegar Fótbolti.net ræddi við hana.
Hún segir að verkefnin tvö muni kalla á ólíka nálgun.
„Úkraína er náttúrulega öðruvísi lið og þær eru kannski meira beinskeyttar í sínum varnar- og sóknarleik. Eru þannig lið að við verðum kannski aðeins meira með boltann heldur en við vorum á móti Englandi og Spáni, vonumst til þess.“
„Á meðan England er ein af sterkustu þjóðunum í heimi í dag og það krefst þess að vera mjög sterkar í varnarleiknum og kannski aðeins meira hugrekki en við vorum með síðast í sóknarleiknum.“
Guðrún segir einnig að það skipti máli að liðið hafi nýlega verið saman í verkefni.
„Þetta er kannski fest í minnum síðasta verkefni, öðruvísi en var á undan því þar sem við vorum ekki búnar að hittast í hálft ár. Það er auðvitað þægilegra og auðveldara að rifja upp hluti.“
„Það er voða gaman að hitta stelpurnar aftur og manni þykir voða vænt um þennan hóp. Það er alltaf jafn gott að hitta alla og knúsa alla og fá svona kannski update af hvað er í gangi hjá hverjum og einum og svona.“
„Það virðast allir vera í góðu standi og margir sem að gengur vel hjá í sínum félagsliðum og eru fullar sjálfstraust komandi inn í verkefnið. Þannig að ég held að það sé bara góður andi í hópnum.“
Að hennar mati þarf liðið að halda áfram að byggja á sínum styrkleikum.
„Við erum að spila á móti Úkraínu og þær eru mjög aggressíft lið og við þurfum að ná að höndla það og þeirri samviskusemi sem þær búa yfir.“
„Við erum náttúrulega með frábært lið og við erum með frábæra leikmenn. Ég hef alveg trú á því að við skorum mark og við höfum alveg verið duglegar að skora mark þó að við höfum ekki náð því í síðasta glugga.“
„Við erum bara að halda áfram að byggja okkar, þora að halda í boltann og byggja sóknir. Þannig ég held að það komi alveg.“
Hún segir stuðninginn úr stúkunni geta skipt miklu máli.
„Það er ótrúlega mikilvægt, það er alveg ástæða fyrir því að fólk segir að þetta 12. leikmaðurinn af því að þeir gefa manni auka orku og gefa manni kraft.“
„Ég vona að allir sjái að stormurinn er búinn og sólin er mætt, þannig að það er bara góða ástæða til að mæta í stúkuna og vera með okkur í þessu.“
Og skilaboðin eru skýr:
„Eigum við ekki bara að koma á völlinn og gera það svolítið erfitt fyrir hin liðin að mæta okkur.“
Sjáðu viðtalið í heild í spilaranum hér að ofan
| Lið | L | U | J | T | Mörk | mun | Stig |
|---|---|---|---|---|---|---|---|
| 1. England | 2 | 2 | 0 | 0 | 8 - 1 | +7 | 6 |
| 2. Spánn | 2 | 2 | 0 | 0 | 6 - 1 | +5 | 6 |
| 3. Ísland | 2 | 0 | 2 | 0 | 0 - 5 | -5 | 0 |
| 4. Úkraína | 2 | 0 | 2 | 0 | 2 - 9 | -7 | 0 |
