Bruno valinn leikmaður tímabilsins af íþróttafréttamönnum

FWA, samtök íþróttafréttamanna á Englandi, kusu um besta leikmann ársins í gær og hlaut Fernandes 45 prósent atkvæða í kjörinu.

Hann fékk 28 fleiri atkvæði en Rice og verður því fyrsti United-maðurinn til þess að hreppa verðlaunin síðan Wayne Rooney árið 2010.

Erling Braut Haaland, sem vann verðlaunin árið 2023, var í þriðja sæti og þá fengu Arsenal-mennirnir David Raya, Gabriel og Bukayo Saka einnig talsverðan fjölda atkvæða.

Fernandes, sem er 31 árs gamall, hefur átt stórkostlegt tímabil með United, en hann hefur skorað átta mörk og er þá með nítján stoðsendingar, aðeins einni stoðsendingu frá því að jafna met Thierry Henry og Kevin de Bruyne.

Portúgalski fyrirliðinn hefur veitt liðsfélögum sínum mikinn innblástur á leiktíðinni og þá sérstaklega síðan Michael Carrick tók við af Ruben Amorim.

Fernandes er tíundi United-maðurinn sem hlýtur þessa viðurkenningu og fer hann þar í hóp með leikmönnum á borð við Cristiano Ronaldo, Bobby Charlton, Roy Keane, Eric Cantona og auðvitað Rooney.

Bunny Shaw, framherji Manchester City í WSL-deildinni, var þá besti leikmaður ársins í kvennaboltanum eftir að hafa skorað 19 mörk í deildinni á tímabilinu. Þetta er í annað sinn sem hún hlýtur verðlaunin.