Afturelding vann gríðarlega sterkan og mikilvægan sigur á Þór/KA 1-0 á Akureyri í Bestu deild kvenna í kvöld. Alexander Aron Davorsson þjálfari liðsins var að vonum ánægður með sigurinn.
Lestu um leikinn: Þór/KA 0 - 1 Afturelding
„Þetta er þannig í fótbolta, þeir sem hafa spilað þennan leik lengi vita það að ef maður skorar snemma gegn jafn góðu liði og Þór/KA er þá detturu til baka og þær sækja og sækja. Eins og ég sagði við þær í hálfleik að þá var mikill karakter að halda út í 45 mínútur," sagði Alexander.
Alexander hrósaði leikmannahópnum í hástert en það hafa orðið miklar mannabreytingar á liðinu í allt sumar. Þar á meðal komu fimm nýir leikmenn inn í EM hléinu.
„Ég verð bara að hrósa leikmönnum mjög mikið, þetta er þriðja liðið sem við búum til í sumar, það er hægt að búa til heila bíómynd eins og Víkingarnir gerðu, um Aftureldingarliðið í sumar, þetta hafa bara verið leikmenn út og leikmenn inn. Þessir leikmenn sem hafa verið frá byrjun eru þeir leikmenn sem eru að hjálpa þeim leikmönnum sem eru að koma inn. Það er ótrúlega dýrmætt að vera í svona liði," sagði Alexander.
„Það sýnir hversu mikill karakter þetta er, það var engin tilviljun að við fórum upp í fyrra, ég get ekki hrósað þessum leikmönnum meira."
Viðtalið í heild sinni má sjá hér fyrir ofan.
