England: Bournemouth niðurlægði Man Utd - Burnley náði í stig

Á Old Trafford í Manchester áttust við Man Utd og Bournemouth en gestirnir komu mörgum á óvart og unnu öruggan sigur.

Dominic Solanke byrjaði veisluna fyrir gestina með marki af stuttu færi strax á fimmtu mínútu leiksins. United gekk illa að skapa sér færi í dag og voru varnarmenn Bournemouth öflugir í dag.

Gestirnir nýttu sín færi frábærlega en þeir skoruðu tvö mörk með stuttu millibili í síðari hálfleiknum. Philip Billing kom inná sem varamaður og tvöfaldaði hann forystuna áður en Marcos Senesi stangaði boltann inn eftir hornspyrnu.

Frábær sigur hjá Bournemouth sem er á góðu skriði en á sama tíma vandræðaleg úrslit fyrir Erik ten Hag og hans lærisveina.

Jóhann Berg Guðmundsson spilaði tæpan klukkutíma þegar Burnley sótti gott stig gegn Brighton og þá vann Sheffield United gífurlega mikilvægan sigur gegn Brentford.

Wolves og Nottingham Forest skildu þá jöfn 1-1. Alla markaskorarana má sjá hér fyrir neðan.

Brighton 1 - 1 Burnley
0-1 Wilson Odobert ('45 )
1-1 Simon Adingra ('77 )

Sheffield Utd 1 - 0 Brentford
1-0 James Mcatee ('45 )

Manchester Utd 0 - 3 Bournemouth
0-1 Dominic Solanke ('5 )
0-2 Philip Billing ('68 )
0-3 Marcos Senesi ('73 )

Wolves 1 - 1 Nott. Forest
0-1 Harry Toffolo ('14 )
1-1 Matheus Cunha ('32 )