Jón Þór Hauksson, landsliðsþjálfari kvenna, var ánægður með sigurinn á Úkraínu á Pinatar æfingamótinu í dag. Hann telur þó að liðið geti gert betur.
Gunnhildur Yrsa Jónsdóttir skoraði eina markið í dag. Ísland vann tvo 1-0 sigra á mótinu, gegn Norður-Írlandi og Úkraínu, en tapaði 1-0 fyrir Skotlandi.
„Það er kannski ekki ósvipað og í fyrsta leiknum að það er gott að halda hreinu og gott að vinna leiki, en það vantaði herslumuninn að reka endahnútinn á fleiri sóknir," sagði Jón Þór.
„Það voru fínir spilkaflar í þessum leik, en oft á tíðum vantar herslumuninn að koma sér virkilega nær markinu og í fleiri afgerandi færi. Oft á tíðum var það síðasta sendingin eða móttakan sem að klikkar."
„Við erum eins og er ekki með hópinn okkar upp á sitt besta. Það kemur inn á það að margir leikmenn eru á undirbúningstímabili og fáir leikmenn að spila í hverri viku 90 mínútur. Það sýnir okkur það að það líði tæplega sex mánuðir á milli landsleikja sé eitthvað sem við getum ekki auðveldlega fundið taktinn í. Við verðum að skoða það."
Að lokum sagði landsliðsþjálfarinn: „Það er jákvætt að við fáum eitt mark í þessum þremur leikjum. Við vinnum tvo leiki og höldum hreinu í tveimur leikjum, það er jákvætt. Það eru jákvæðir punktar sem við tökum áfram. Það er líka ljóst að það er heilmargt sem við verðum að gera á milli verkefna til að mæta vel undirbúin til leiks þegar undankeppni EM byrjar aftur."
Hér að neðan má sjá markið sem Gunnhildur Yrsa skoraði.
Hér má sjá markið, en Gunnhildur Yrsa Jónsdóttir skoraði það.#dottir #LeiðinTilEnglands pic.twitter.com/NEB7BL2JLz
— Knattspyrnusambandið (@footballiceland) March 10, 2020
Athugasemdir