Thelma Karen Pálmadóttir segir íslenska landsliðið staðráðið í að ná í sigur gegn Úkraínu í komandi heimaleik, sem er lykilleikur í baráttunni um þriðja sæti riðilsins.
„Já það er það, það er markmiðið okkar að halda okkur og enda í þriðja sæti. Þannig það er mjög mikilvægt að við vinnum Úkraínu og við munum bara gera allt til að vinna þær,“ sagði Thelma þegar Fótbolti.net ræddi við hana.
Hún segir stemninguna í hópnum góða fyrir tvo heimaleiki.
„Bara mjög vel, ég er bara mjög spennt. Það er mjög gaman að fá tvo heimaleiki og koma aðeins heim þannig ég held að við séum allar bara mjög spenntar.“
„Við erum alveg byrjaðar aðeins að fara yfir þeirra leik og svona. Það eru náttúrulega margar æfingar fram að leik, þannig að við nýtum bara allan tímann sem við höfum til að undirbúa okkur sem best.“
Thelma Karen kemur inn í verkefnið í góðu formi eftir að hafa unnið sér sæti í byrjunarliði sænska liðsins Häcken. Bjóst hún við því á þessum tímapunkti?
„Ég eiginlega veit það ekki, nei kannski ekki en ég vissi alveg að staðan, þessi hægri kantmannastaða í Häcken væri svolítið opin. Ég var kannski ekki alveg að búast við því að vera í svona stóru hlutverki strax en mér finnst það bara mjög fínt.“
Hún segir atvinnumennskuna hafa hjálpað sér að þróa leik sinn.
„Ég myndi segja alls konar smáatriði, sem er náttúrulega farið meira út í og meir tíma eytt í, í atvinnumennsku heldur en hérna heima. Þannig að alls konar svona litlir hlutir sem fólk kannski tekur ekkert eftir.“
Hjá Häcken hitti Thelma Karen fyrir landsliðsfélaga sinn hana Fanneyju Ingu Birkisdóttur, hvernig er að hafa hana í liðinu?
„Það er bara frábært, hún er búin að hjálpa mér ekkert eðlilega mikið og bara búin að gera allt miklu, miklu auðveldara fyrir mig. Ég er mjög þakklát að hún sé þarna.“
Fram undan eru stórleikir hjá félagsliði hennar þar sem hún mun mæta öðrum liðsfélaga í landslinu henni Guðrúnu Arnardóttur.
„Við ræddum þetta aðeins í gær að við erum að fara hittast bara daglega þarna á einhverjum tveim vikum eða eitthvað. Þetta er bara mjög spennandi, það er alltaf gaman að fara í svona úrslitaleiki.“
Að lokum segir hún stuðning úr stúkunni skipta miklu máli.
„Það er gríðarlega mikilvægt, við vonumst til þess að fá mikið af fólki á völlinn. Þetta verður vonandi skemmtilegur leikur til að horfa á.“
