Viktor Bjarki er búinn að eiga frábært tímabil með FCK
Viktor Bjarki Daðason skoraði þriðja deildarmark sitt á tímabilinu og það á innan við fjórum vikum í 4-0 stórsigri FCK á Silkeborg í neðri hluta umspilinu í dönsku úrvalsdeildinni í dag.
Framarinn skoraði sitt fyrsta deildarmark gegn Velje um miðjan apríl og er nú kominn í góðan gír.
Það var ekki komin mínúta á klukkuna er Viktor skoraði fyrsta mark FCK eftir frábæra sendingu Gabriel Pereira.
Thomas Delaney bætti við öðru fyrir lok fyrri hálfleiks. Youssoufa Moukoko kom inn á fyrir Viktor Bjarka undir lokin og skoraði Moukoko úr vítaspyrnu sex mínútum síðar áður en Victor Claesson rak síðasta naglann í kistu Silkeborg.
FCK er á toppnum í neðri hlutanum og fer í umspil um sæti í Sambandsdeild Evrópu.
Rúnar Alex Rúnarsson var allan tímann á bekknum hjá FCK.
Hjörtur Hermannsson var í vörn Volos sem tapaði fyrir Herði Björgvini Magnússyni og félögum í Levadiakos, 3-0. Hörður var á bekknum hjá Levadiakos sem er einum sigri frá því að tryggja sér fimmta sæti grísku deildarinnar.
Daníel Tristan Guðjohnsen kom inn af bekknum hjá Malmö í 3-2 tapi Häcken í sænsku úrvalsdeildinni. Arnór Sigurðsson var ekki með Malmö sem er í 7. sæti með 10 stig.
