„Erum ekkert að borða rækjusamlokur þarna inni"
Sést aðeins í joggingbuxurnar.
„Mér fannst við mjög góðar sóknarlega, frábærar þar og vorum með marga valkosti. Við vorum ekkert rosalega slakar eins og joggingbuxur sem við viljum oft nota," sagði Alfreð Elías Jóhannsson, þjálfari Selfoss, eftir að ljóst var að hans lið væri komið áfram í 8-liða úrslit Mjólkurbikarsins.
Lestu um leikinn: Stjarnan 0 - 3 Selfoss
Lestu um leikinn: Stjarnan 0 - 3 Selfoss
„Við notuðum ýmis kerfi í dag og eitt af því var 'Broddi Kristjánsson', hann kom sterkur inn." Broddi var á sínum tíma mjög öflugur badmintonspilari og varð árið 2009 heimsmeistari í flokki 45-49 ára.
Jafnræði var með liðunum fram að 40. mínútu áður en Hólmfríður Magnúsdóttir, sem skoraði tvö mörk í kvöld, skoraði fyrsta mark Selfoss. Alfreð var spurður hvað hefði verið rætt inn í klefa í hálfleik.
„Við erum ekkert að borða rækjusamlokur þarna inni. Við förum aðeins yfir málin, hvað sé hægt að læra af hverjum og einum hálfleik og staðan hefði getað verið 1-3 í hálfleik. Við þurftum bara að halda áfram að spila okkar leik. Mér fannst við ekki góðar varnarlega í fyrri hálfleik en lokuðum svæðunum betur í seinni. Frábært að komast áfram á móti sterku liði Stjörnunnar," sagði Alfreð við þeirri spurningu.
Alfreð var næst spurður út í næsta leik í deildinni sem er gegn Þrótti R. og má hlusta á hans svar við því í spilaranum hér að ofan. En að lokum, hver er óskamótherji Alfreðs í 8-liða úrslitunum?
„Það er bara að fá heimaleik, við vitum hvað var gaman í fyrra [þegar Selfoss varð bikarmeistari] og við viljum endurtaka leikinn."
