Hafrún Rakel segir íslenska landsliðið klárt í slaginn fyrir komandi heimaleik gegn Úkraínu, þar sem mikið er undir í baráttunni um úrslit í riðlinum.
„Bara mjög vel. Ég er bjartsýn og við erum klárar í slaginn og bara ógeðslega spenntar fyrir þessu,“ sagði Hafrún þegar Fótbolti.net ræddi við hana.
Að hennar sögn hefur undirbúningurinn gengið vel og stemningin í hópnum sé sterk.
„Hún er mjög góð, við erum búnar að æfa vel og bara góð stemming. Við erum klárar í að sýna hvað við getum núna.“
Leikurinn gegn Úkraínu er lykilleikur og segir Hafrún að liðið þurfi að vera tilbúið frá fyrstu mínútu.
„Vera klárar strax frá fyrstu mínútu. Þær eru góðar og góðar að pressa, þær eru duglegar þannig að við þurfum bara að matcha það. Sýna að við erum betra lið og klára leikinn.“
Hún segir liðið hafa lært mikið af síðasta landsliðsglugga.
„Við erum búin að matcha okkur við betri lið og sjáum svolítið hvað þær geta. En núna er fókusinn bara á Úkraínu og klára það fyrst.“
Stuðningur úr stúkunni getur skipt sköpum að hennar mati.
„Hann skiptir ótrúlega miklu máli. Hann getur gefið okkur extra upp á það að vera tilbúnar að berjast.“
Til að trekkja að stuðningmenn var opin æfing og áritanir frá stelpunum okkar, hún vonast til að sjá þá stemmingu skila sér á völlinn.
„Ég sagði allavega við alla, sjáumst á þriðjudaginn! Þannig að vonandi kemur þetta fólk á völlinn og ennþá fleiri.“
Sjáðu viðtalið í heild í spilaranum hér að ofan.
