Myndir frá fögnuði Barcelona - „Næsta skref er að vinna Meistaradeildina“

Barcelona og Real Madrid áttust við í El Clásico slagnum í gær og komust heimamenn í tveggja marka forystu á fyrstu 18 mínútum leiksins.

Það reyndust einu mörk leiksins. Barcelona tryggði sér Spánarmeistaratitilinn með þessum sigri og því hefur liðið unnið La Liga bæði árin undir stjórn Hansi Flick.

„Hver einasti titill er einstakur, þessi er sérstakur að því leyti að við tryggðum hann á heimavelli gegn Real Madrid," sagði Frenkie de Jong, miðjumaður Barcelona, eftir leik.

„Hansi er okkur mikilvægur. Hann er með skýrar hugmyndir og gefur okkur frjálsræði til að sýna gæði okkar. Næsta skref hjá okkur er að vinna Meistaradeildina og það tækifæri gefst á næsta tímabili."

Hér má sjá myndaveislu frá fögnuði Börsunga.