Ingibjörg Sigurðardóttir segir íslenska landsliðið þurfa að sýna bæði hugrekki og þolinmæði þegar liðið mætir Úkraínu í komandi heimaleik á þriðjudaginn.
„Mjög spennandi leikir og gott að vera á heimavelli. Mjög ólíkir leikir, Úkraínuleikurinn er leikur þar sem við viljum vera mikið með boltann og sækja sigur.“
Hún segir stemminguna í hópnum góða fyrir verkefnið.
„Stemningin er bara góð, ég held að allar séu ánægðar að vera heima. Við erum mjög spenntar fyrir leiknum á móti Úkraínu núna.“
Að hennar sögn er mikilvægt að nýta heimaleikina eftir erfiðan síðasta glugga.
„Það er alveg mjög mikilvægt. Við vissum svo sem að þetta yrði erfiður riðill, fengum tvö bestu lið í heimi. Við vissum alltaf að þetta væri að fara vera mjög krefjandi. Mjög gott að fá þessa heimaleiki núna.“
Ingibjörg segir lykilatriði að halda ró sinni á boltanum.
„Við þurfum að vera hugrakkar á boltann og þolinmóðar. Þær munu liggja lágt á vellinum, þannig að þolinmæði og svo bara að vera aggressívar inn í teignum líka. Bæði teignum okkar og teignum þeirra, að slútta og verja markið. Þetta verður mikill baráttuleikur.“
Hún segir liðið hafa lært mikið af síðasta verkefni.
„Já það er alveg ótrúlega margt. Þetta voru erfiðir leikir en maður lærir ótrúlega mikið af þessum leikjum. Það er bara margt sem við getum tekið með okkur úr þessum bæði jákvætt og neikvætt.“
Ingibjörg spilar með Freiburg í þýsku Bundesligunni og segir reynsluna þar hafa hjálpað sér.
„Ég er mjög ánægð að ég fór í þýsku deildina núna. Þetta er miklu hærra level og þetta er miklu líkara þeim bolta sem er spilaður hérna í landsliðinu. Þannig bara að þora svolítið meira og taka af skarið með boltann.“
Að lokum segir hún stuðning úr stúkunni skipta miklu máli.
„Það er alltaf mikilvægt. Mér finnst að við eigum að vera nálægt því að fylla völlinn alltaf þegar við spilum. Við eigum bara að setja standardinn þar.“
Sjáðu viðtalið í heild í spilaranum hér fyrir ofan.
