Sambandsdeildin: Þægilegt fyrir Chelsea í kuldanum í Kasakstan

Chelsea fór í nokkuð þægilega ferð til Kasakstan í dag þegar liðið mætti Astana í Sambandsdeildinni. Það var kalt í veðri en það hafði engin áhrif á enska liðið.

Flestir lykilmenn liðsins fengu frí og voru ekki í leikmannahópnum í dag en það kom ekki að sök.

Spænski framherjinn Marc Guiu hefur fengið tækifæri í Evrópuleikjum liðsins á tímabilinu en hann skoraði tvö fyrstu mörk liðsins. Það var svo Renato Veiga sem innsiglaði sigur liðsins þegar hann skoraði eftir hornspyrnu frá Kieran Dewsbury-Hall.

Þrír ungir og óreyndir leikmenn voru í byrjunarliði Chelsea í dag og þá voru varamenn liðsins einnig reynslulitlir. Chelsea er í ansi góðum málum á toppi deildarinnar með fullt hús stiga eftir fimm umferðir.