Svakalegt flakk á strákunum okkar - Fjórir leikir í einum glugga

UEFA hefur birt leikjaniðurröðun fyrir Þjóðadeild karla en dregið var í riðla í gær. Ísland leikur þar í C-deild og er með Búlgaríu, Eistlandi og sigurvegaranum í umspili Lúxemborgar og Möltu í riðli.

Leikirnir fara fram í september, október og nóvember.

Landsliðsdagatalið er talsvert breytt og verður einn stór þriggja vikna landsleikjagluggi frá september og inn í október.

Á ellefu daga kafla mun Ísland spila fjóra leiki. Ekki nóg með það heldur byrjar íslenska liðið á heimaleik, fer svo í útileik í Lúxemborg eða Möltu, heldur aftur heim á Laugardalsvöll og endar svo í Tallinn í Eistlandi. Alvöru flakk á strákunum okkar!