Fótbolti.net

fös 13. mars 2026 21:08

Ívan Guðjón Baldursson

Eiður Smári: Arsenal er bara betri útgáfan af Stoke

Mynd: Fótbolti.net - Jónína Guðjörg Guðbjartsdóttir

Mynd: EPA

Hjörvar Hafliðason og félagar ræddu ýmislegt í lokaþætti vikunnar hjá Dr. Football og barst Arsenal í tal eftir jafntefli gegn Bayer Leverkusen í 16-liða úrslitum Meistaradeildarinnar.

Hjörvar vildi hrósa Mikel Arteta þjálfara fyrir að vera að ná því allra besta úr leikmannahópnum sínum en Eiður Smári Guðjohnsen er ekki sérlega hrifinn.

„Mikel Arteta, þetta er ótrúlegur náungi. Þegar ég horfi á þetta lið þá eru þeir með frábæran djúpan miðjumann í Declan Rice. Þeir eru með tvo mjög góða miðverði en framávið þá eru þeir með Martinelli, Trossard og Eze sem eru bara fínir. Þetta er allt fínt, þetta er ekkert eitthvað framúrskarandi sem er í gangi þarna. Hann er að ná öllu sem hann getur úr þessu liði, erum við ekki búnir að vera alltof lítið að hrósa Mikel Arteta fyrir það sem hann er að gera?" sagði Hjörvar.

Eiður Smári svaraði og gagnrýndi umdeildan leikstíl Arsenal þar sem hann kallaði liðið betri útgáfu af Stoke City, sem var frægt áður fyrr fyrir harðan varnarleik og að leggja mikið upp úr föstum leikatriðum undir stjórn Tony Pulis.

„Ef hann klárar þetta þá er hann búinn að fá of mikla gagnrýni en það sjá allir hvernig þeir spila. Þetta er bara betri útgáfan af Stoke.

„Þegar þú ert kominn inn á þetta stig á tímabilinu þá er bara að drulla sér yfir línuna einhvern veginn. Það er tilfinningin sem maður hefur núna, þeir ætla bara einhvern veginn að drulla sér yfir línuna loksins."

Arsenal vann ensku úrvalsdeildina síðast fyrir meira en 20 árum síðan og hefur liðið nokkrum sinnum verið nálægt því að endurheimta titilinn án þess að takast ætlunarverk sitt. Þeir hafa þó sjaldan verið í betri stöðu á þessum tímapunkti deildartímabilsins.

„Ég hef skilning á því að reyna að vinna deildina en ég hef ekki skilning á hversu mikla áherslu er lagt á þessar hornspyrnur og að tefja. Þeir eru að setja alskonar met, leiðindamet sem þú vilt ekki láta bendla þig við og því miður er fókusinn orðinn svo mikill á fótbolta í dag að þetta gleymist hvernig Arsenal vann deildina. Við gátum ekki talað um að Leicester hafi verið leiðinlegir þegar þeir unnu deildina. Það kemur jafn mikið á óvart að Arsenal sé að vinna deildina eins og þegar Leicester vann á sínum tíma."

		L	U	J	T	ms:	mf:	mun	Stig
1	Arsenal	32	21	7	4	62	24	+38	70
2	Man City	31	19	7	5	63	28	+35	64
3	Man Utd	32	15	10	7	57	45	+12	55
4	Aston Villa	32	16	7	9	43	38	+5	55
5	Liverpool	32	15	7	10	52	42	+10	52
6	Chelsea	32	13	9	10	53	41	+12	48
7	Brentford	32	13	8	11	48	44	+4	47
8	Everton	32	13	8	11	39	37	+2	47
9	Brighton	32	12	10	10	43	37	+6	46
10	Sunderland	32	12	10	10	33	36	-3	46
11	Bournemouth	32	10	15	7	48	49	-1	45
12	Fulham	32	13	5	14	43	46	-3	44
13	Crystal Palace	31	11	9	11	35	36	-1	42
14	Newcastle	32	12	6	14	45	47	-2	42
15	Leeds	32	8	12	12	39	49	-10	36
16	Nott. Forest	32	8	9	15	32	44	-12	33
17	West Ham	32	8	8	16	40	57	-17	32
18	Tottenham	32	7	9	16	40	51	-11	30
19	Burnley	32	4	8	20	33	63	-30	20
20	Wolves	32	3	8	21	24	58	-34	17