Bönkuðu „óvart" upp á hjá Guðjóni Pétri og sannfærðu hann um að koma í Val

„Ég var að renna út á samningi eftir tímabilið 2015. Óli Jó og Bjössi Hreiðars, rebbaskapur í þeim, þeir eru þarna mættir á Hlíðarenda og voru klókir, byrjuðu að vasast í mér."

„Þeir bönkuðu í eitt skiptið upp á heima hjá mér, þóttust vera að fara í húsið við hliðina á: „Býrð þú hér?" og spurðu mig hvort ég ætlaði ekki að bjóða þeim inn. Þeir komu inn og þá sagði Óli: „Þú ert að koma til mín á næsta ári." Ég var ekki búinn að semja eða neitt slíkt, en þeir náðu mér þarna. Þeir töluðu um að fá mig fyrir mótið 2015, man að þeir gerðu svo tilboð um mitt mót til að æsa í Blikunum. Þá var ég búinn að vera spila vel. Um mitt mót ætluðu Blikarnir að semja við mig," sagði Guðjón Pétur sem var þá búinn að ákveða að hann myndi fara í Val eftir tímabilið.

Hann gaf ekki upp nákvæma tímasetningu á heimsóknunni en miðað við frásögnina má álykta að um sé að ræða atburð sem átti sér stað áður en önnur félög máttu byrja að ræða við miðjumanninn um að fá hann í sínar raðir.

„Óli og Bjössi, þetta er rosalegasta dúó allra tíma, þeir eru hættulegir saman," sagði Guðjón Pétur.

Hjá Val varð hann tvisvar sinnum Íslandsmeistari og einu sinni bikarmeistari.