Karólína Lea Vilhjálmsdóttir var ánægð eftir 1-0 sigur Íslands á Úkraínu. Það var ekki síður augljóst hversu stolt hún var af samherja sínum, Thelmu Karen Pálmadóttur sem kom inn í byrjunarliðið í fyrsta skiptið.
„Mjög sátt, gerðum oft mjög vel. Eitt mark sýnir kannski ekki alveg hvernig leikurinn var en þrjú stig," sagðí Karólína Lea eftir leik.
Lestu um leikinn: Ísland 1 - 0 Úkraína
Völlurinn leit út fyrir að vera þungur og blautur og hafði aðeins áhrif á sóknarleik okkar kvenna.
„Ísland í apríl er bara svona og við þurfum bara að taka því. Völlurinn var betri en ég bjóst við, það er ekkert út á hann að setja."
Hin unga og efnilega Thelma Karen Pálmadóttir var í fyrsta skiptið í byrjunarliðinu í kvöld og var Karólína mjög stolt af sinni konu.
„Bara geggjað að sjá hana, ég hef alltaf vitað af henni. Ég þjálfaði hana þegar hún var í einhverjum fótboltaskóla í FH. Ég er eins og einhver stolt mamma þegar ég sé hana. Ekkert smá gaman að spila með henni og hrikalega stolt af henni.
Sjáðu viðtalið í heild í spilaranum hér að ofan.
