Ægir, sem spilar í Lengjudeildinni, tryggði sér sæti í 8-liða úrslitum Mjólkurbikarsins í dag með sigri á Bestu deildarliði KA á Akureyri í dag.
Fótbolti.net ræddi við Ómar Castaldo Einarsson, markvörð Ægis, eftir leikinn.
Fótbolti.net ræddi við Ómar Castaldo Einarsson, markvörð Ægis, eftir leikinn.
Lestu um leikinn: KA 1 - 2 Ægir
„Þetta er mjög góð tilfinning. Við komum inn í þennan leik og vissum að pressan yrði á þeim eins og þeir eru búnir að byrja deildina. Við komum inn með enga pressu og vildum spila fótbolta. Það virkaði helvíti vel," sagði Ómar.
„Þeir skora eitt skítamark, Dabbi rann klaufalega, það getur gerst. Mér leið eins og þeir væru aldrei að fara skora í seinni þó svo að þeir væru að ógna en það virkaði og mér fannst við alltaf vera með yfirhöndina og stjórn á leiknum."
Ægir er án stiga eftir fyrstu þrjár umferðirnar í deildinni. Þetta var góður sigur fyrir félagið og Ómar sem var á mála hjá Þór sumarið 2023.
„Þetta er risasigur fyrir klúbbinn. Við erum búnir að byrja tímabilið illa í Lengjudeildinni, vonandi gefur þetta okkur sjálfstraust inn í komandi leiki," sagði Ómar.
„Það var nóg að gera og maður hefur gaman af þessu. Maður vill spila þessa leiki sem skipta extra meira máli. Maður var nátturulega í Þór, maður er með Þórshjarta þannig það er gaman að vinna KA."
Ómar vonaðist til að fá heimaleik í 8-liða úrslitum. Hann fékk ósk sína uppfyllta þar sem liðið fær Breiðablik í heimsókn.
