Cristiano Ronaldo kom Man Utd yfir snemma leiks en eftir 35 mínútna leik fékk Aaron Wan-Bissaka, bakvörður Man Utd, að líta beint rautt spjald fyrir ljóta tæklingu.

Við það breyttist leikurinn. Heimaliðið hafði spilað vel fram að rauða spjaldinu, en eftir það var leikurinn í raun einstefna.

Jöfnunarmarkið kom á 66. mínútu og sigurmarkið kom í uppbótartímanum eftir skelfileg mistök frá varamanninum Jesse Lingard.

Tölfræðin segir í raun alla söguna. Eftir rauða spjaldið, þá átti Man Utd ekki eina marktilraun og þeir náðu aðeins að vera 30 prósent með boltann. Þeim tókst ekkert að halda í boltann og voru undir mikilli pressu alveg frá því rauða spjaldið fór á loft.

Ole Gunnar Solskjær, stjóri Man Utd, liggur undir mikilli gagnrýni. „Kvöldið var að fara vel fyrir United áður en Wan-Bissaka átti slæma snertingu. Nánast hver einasta ákvörðun sem Solskjær tók eftir það, var röng ákvörðun," skrifar Samuel Luckhurst, penni Manchester Evening News á Twitter.

Solskjær ákvað að fara í fimm manna vörn í hálfleik og færði liðið mikið aftar á völlinn. Hann tók svo bæði Cristiano Ronaldo og Bruno Fernandes af velli snemma í seinni hálfleik, sem dæmi um ákvarðanir hans í þessum leik.

Margir spyrja sig hvort Solskjær sé rétti maðurinn fyrir Man Utd og þessi úrslit, og þessi leikur, mun ekki sannfæra einn né neinn um það.