Aston Villa og Liverpool áttust við í spennandi slag í ensku úrvalsdeildinni sem gat tryggt meistaradeildarsæti fyrir sigurliðið.

Það ríkti nokkuð jafnræði með liðunum í fyrri hálfleik en Morgan Rogers náði forystunni fyrir heimamenn eftir vel útfærða stutta hornspyrnu. Rogers gerði virkilega vel að skora úr erfiðu færi með að leggja boltann snyrtilega í fjærhornið.

Staðan var 1-0 í leikhlé en hollenski varnarjaxlinn Virgil van Dijk, sem er fyrirliði Liverpool, jafnaði í upphafi síðari hálfleiks með föstum skalla eftir frábæra aukaspyrnu frá Dominik Szoboszlai.

Það var mikil ákefð í seinni hálfleiknum þar sem liðin skiptust á að sækja en heimamenn voru talsvert hættulegri í sínum sóknaraðgerðum og endurheimtu forystuna skömmu eftir jöfnunarmark Van Dijk. Ollie Watkins skoraði eftir að Szoboszlai rann illa með boltann í vörn. Rogers stal boltanum og lagði hann á Watkins sem skoraði.

Watkins fékk tækifæri til að bæta öðru marki við og skaut Emiliano Buendía í samskeytin áður en þriðja mark heimamanna leit dagsins ljós, og aftur var Watkins á ferðinni. Í þetta skiptið skoraði hann með frákasti eftir hornspyrnu. Giorgi Mamardashvili varði í tvígang frá leikmönnum Villa áður en Watkins fylgdi eftir af stuttu færi.

Staðan var þá orðin 3-1 og tóku gestirnir að sækja án þess að skapa mikla hættu. Þess í stað innsiglaði John McGinn sigur heimamanna með glæsilegu marki á lokamínútunum. McGinn lét vaða frá vítateigslínunni og sveif boltinn snyrtilega undir samskeytin.

Fjörið var þó ekki búið því Van Dijk skoraði sitt annað mark í uppbótartíma, með skalla eftir fyrirgjöf í kjölfar stuttrar hornspyrnu.

Meira var ekki skorað í fjörugum slag svo lokatölur urðu 4-2 fyrir Aston Villa sem er búið að tryggja sér meistaradeildarsæti næsta haust með þessum sigri.

Liverpool er þremur stigum á eftir Villa og er ennþá í bílstjórasætinu í baráttunni um síðasta lausa meistaradeildarsætið fyrir lokaumferð tímabilsins á heimavelli gegn Brentford.