Lárus Orri fagnaði sigri með sínum mönnum í dag
Lárus Orri Sigurðsson þjálfari ÍA var nokkuð kátur eftir 3-1 sigur lærisveina hans á liði Aftureldingar á Elkem vellinum á Akranesi í dag. Með sigrinum lyfti lið ÍA sér úr botnsæti deildarinnar sem nú skiptist í tvo riðla. Sigurinn markar einnig þau tímamót að Skagamenn tengja saman tvo sigurleiki sem gefur þeim byr undir báða vængi inn í úrslitakeppnina. En hvað skóp sigurinn?
Lestu um leikinn: ÍA 3 - 1 Afturelding
„Vinnusemi og samstaða í liðinu. Við vorum ryðgaðir fyrstu tuttugu mínúturnar og greinilegt að Blikaleikurinn sat aðeins í mönnum. En eftir það þá náðum við pressunni betur upp, fórum að skapa okkur færi og sendingarnar gengu betur upp og eftir þessar fyrstu tuttugu þá fannst mér þetta aldrei spurning.“
Síðustu tvær umferðir hafa verið með ágætum hjá ÍA og liðið sem margir voru búnir að bóka niður í Lengjudeildina hefur lyft sér úr botnsætinu þó enn séu þrjú stig í öruggt sæti. Frammistaðan í síðustu tveimur leikjum hefur verið með ágætum en merkir Lárus eitthvað augnablik þar sem viðsnúningurinn hófst?
„Það munar bara öllu þegar þú nærð að vinna leiki og setja stig á töfluna. Það sem gerist er að á einhverjum tímapunkti þá föllum við mjög langt afturúr. Við erum ekki að vinna og liðin í kringum okkur eru að vinna og við föllum afturúr. Þetta varð svolítið erfitt fyrir hópinn og bara alla enda erfið staða að vera í og ruglar með hausinn á þér.“
„Við vorum ekki líkir okkur sjálfum á móti Víkingum hér heima og ÍBV í Eyjum. Eftir leikinn í Eyjum tóku menn sig saman og ákváðu að þetta væri orðið ágætt. Ætluðu að fara að berjast svolítið fyrir þessu og fara í svolítið "fuck you mode" og þar erum við núna og þar ætlum við að vera áfram. “
Rúnar Már Sigurjónsson heldur áfram að heilla í miðverðinum hjá ÍA og átti fínan leik í dag. Það er munur að vera með miðvörð sem getur leikið boltanum? var Lárus spurður að.
„Rúnar er að gera mjög flotta hluti þarna aftast. Ég held að ég hafi talað um það í tvö ár í sjónvarpinu að það þýddi ekkert að vera með miðjumann í hafsentinum. Ég verð því að éta orðin mín með það því hann er að spila vel þarna aftast og var flottur í dag.“
Sagði Lárus Orri en allt viðtalið má sjá hér að ofan.
Athugasemdir
