HM: Hollendingar keyrðu yfir Svía - Tvær tvennur og frábær innkoma Summerville

Hollendingar unnu sinn fyrsta leik á heimsmeistaramótinu með sannfærandi 5-1 sigri á Svíþjóð á NRG-leikvanginum í Houston í Texas í kvöld.

Fyrri hálfleikurinn var mjög kaflaskiptur. Hollendingar voru með öll völd fyrstu tuttugu mínúturnar og nýttu þann kafla vel með tveimur mörkum frá Brian Brobbey.

Brobbey var að byrja sinn fyrsta leik á HM og þurfti ekki nema tæpar fimm mínútur til að láta til sín taka. Bart Verbruggen hamraði boltanum langt fram völlinn á Brobbey, sem lagði hann á Tijjani Reijnders. Hann fann Cody Gakpo úti vinstra megin og Gakpo kom með hnitmiðaða sendingu fyrir markið á Brobbey, sem lagði boltann í netið.

Brobbey olli varnarmönnum Svía miklum vandræðum og aðeins tólf mínútum síðar kom annað markið. Denzel Dumfries var sífellt hættulegur hægra megin og það skilaði sér þegar hann kom boltanum inn á teiginn á Brobbey, sem náði að pota honum neðst í vinstra hornið.

Eftir vatnspásuna gerði Graham Potter breytingar á leikskipulagi Svía og þá fóru hlutirnir að smella. Viktor Gyökeres, Alexander Isak og Yasin Ayari tengdu vel saman og það var í raun ótrúlegt að liðið skyldi ekki ná að skora áður en flautað var til hálfleiks.

Verbruggen var öflugur í marki Hollendinga og þá var eitt mark Svía dæmt af vegna rangstöðu eftir aukaspyrnu.

Þetta var mjög sterkur kafli hjá Svíum, sem voru vel inni í leiknum, en þeir náðu ekki að viðhalda orkustiginu í upphafi síðari hálfleiks.

Cody Gakpo bætti við þriðja marki Hollendinga með skoti af stuttu færi eftir sendingu frá Dumfries þvert fyrir markið. Skömmu síðar gerði Gakpo annað mark sitt eftir sendingu frá varamanninum Crysencio Summerville.

Gakpo færði þá boltann af vinstri yfir á hægri og smellti föstu skoti neðst í vinstra hornið.

Það var þó enn einhver andi í Svíum og þeir náðu að minnka muninn þegar Anthony Elanga, sem hafði komið inn á sem varamaður, fékk boltann í gegn og setti hann framhjá Verbruggen.

Isak fékk ekki mikla þjónustu í leiknum, þrátt fyrir að hafa verið ágætur í að þjónusta aðra, en hann átti hörkuskot undir lokin þegar hann skrúfaði boltann í átt að fjærhorninu. Verbruggen svaraði hins vegar með glæsilegri vörslu.

Svíar náðu ekki að minnka muninn frekar og Hollendingar bættu við fimmta markinu á 89. mínútu. Summerville lét þá vaða rétt fyrir utan teig og skoraði með frábæru skoti neðst í vinstra hornið.

Þvílík innkoma hjá Summerville, sem kom við sögu í öllum þremur mörkum Hollands í síðari hálfleiknum. Hann meiddist undir lok leiksins og vonandi er það ekki slæmt fyrir hollenska liðið sem þarf svo sannarlega á honum að halda.

Hollendingar unnu 5-1 og eru komnir í efsta sæti F-riðils með fjögur stig á meðan Svíar eru í öðru sæti með þrjú stig. Japan getur komist upp fyrir Svía með sigri á Túnis í nótt.