Spánn: Sevilla tapaði á heimavelli

Óvænt úrslit litu dagsins ljós í Sevilla í dag þar sem heimamenn töpuðu fyrir Villarreal.

Varnarmaðurinn reyndi Raul Albiol kom gestunum yfir eftir hornspyrnu í fyrri hálfleik og var staðan 0-1 eftir nokkuð jafnan fyrri hálfleik.

Heimamenn skiptu um gír eftir leikhlé og sóttu grimmt að marki gestanna en aðeins eitt skot af sextán hitti rammann. Það var skot Munir El Haddadi sem fór á rammann og endaði í netinu, hann skoraði eftir lága fyrirgjöf frá Sergio Reguilon.

Tólf mínútum síðar gerði Karl Toko Ekambi sigurmarkið eftir frábæran undirbúning frá Manuel Trigueros sem gjörsamlega hakkaði rangstöðutaktík Sevilla í sig með frábæru hlaupi áður en hann renndi knettinum til Ekambi sem skoraði auðveldlega.

Heimamönnum tókst ekki að jafna á lokakaflanum og eru því áfram í þriðja sæti, fjórum stigum eftir toppliði Barcelona.

Villarreal hefur ekki gengið sérlega vel á tímabilinu og var þetta fyrsti sigur liðsins síðan í október. Liðið er í neðri hluta deildarinnar, með 22 stig eftir 17 umferðir.