Íslenski landsliðsmaðurinn Alfreð Finnbogason er mættur aftur á völlinn eftir smávægileg meiðsli en hann spilaði í 1-1 jafntefli Augsburg gegn Eintracht Frankfurt í þýsku deildinni.

Alfreð hefur gengið í gegnum gríðarlega erfið meiðsli síðasta eina og hálfa árið eða svo.

Hann spilaði ekkert í byrjun tímabils en kom til baka í október og lék nokkra leiki fyrir Augsburg áður en hann meiddist aftur.

Alfreð byrjaði að æfa aftur með Augsburg nýlega og var á bekknum í dag en hann fékk síðustu sjö mínútur leiksins.

Daichi Kamada gerði mark Frankfurt á 22. mínútu áður en austurríski framherjinn Michael Gregoritsch jafnaði á 38. mínútu leiksins.

Augsburg er í 16. sæti með 19 stig á meðan Frankfurt er í 8. sæti með 28 stig.