Jóhannes Karl Guðjónsson, þjálfari ÍA.
„Við vorum bara klaufar. KA menn komu sér í forystu snemma leiks og það var virkilega svekkjandi. Við ætluðum að vera töluvert öflugri en þetta," voru fyrstu viðbrögð Jóhannesar Karls Guðjónssonar, þjálfara ÍA, eftir tap gegn KA á heimavelli í dag.
Lestu um leikinn: ÍA 0 - 2 KA
Skagamenn eru á botni deildarinnar með fimm stig en liðið er búið að tapa þremur leikjum í röð í deildinni núna.
„Við erum ekki sáttir með þetta en taflan lýgur ekkert. Við erum með fimm stig á botninum og það er undir okkur komið að lagfæra það. Það er ekkert hægt að vera tala um það í einhverju viðtali hérna, við þurfum að gera það þegar við komum inn á völlinn."
Óttar Bjarni Guðmundsson fékk rautt spjald í kvöld en Skagamenn hafa mikið verið að láta reka sig út af í leikjum á þessi tímabili.
„Óttar er bara klaufi þegar hann fer í tæklinguna og ég held að þetta hafi bara verið réttilega rautt spjald. Það er gríðarlega svekkjandi að missa Óttar Bjarna útaf og í leikbann líka. Við þurfum að vera klókari en þetta og þetta eru vonbrigði."
Viðtalið í heild sinni má sjá í sjónvarpinu hér að ofan
