„Þetta var óþarflega erfitt. Vorum að elta síðustu tuttugu mínúturnar, mikið hlaup og erfitt en þetta hafðist svo maður er glaður," sagði Viktor Jónsson eftir sigur ÍA á Þór í dag.
Lestu um leikinn: Þór 1 - 2 ÍA
Viktor kom ÍA yfir með skallamarki eftir aukaspyrnu frá Guðmundi Þórarinssyni.
„Gummi tekur góða spyrnu á fjærstöngina. Ég næ að búa mér til pláss og vinna boltann og skalla hann í fjær. Mér sýndist hann ná að setja aðeins puttana í þetta en það er erfitt að verja svona þegar maður nær góðum skalla," sagði Viktor.
Viktor var hins vegar svekktur að hafa ekki skorað annað mark þegar Aron Birkir Stefánsson varði vítaspyrnu frá honum.
„Það er svekkjandi að ná ekki að skora en það kemur fyrir á bestu bæjum, stundum klikkar maður á vítum, það er bara eins og það er," sagði Viktor.
Viktor er bjartsýnn á að Skagamenn séu á góðri leið.
„Komnir tveir leikir í röð með bikarnum. Vð höldum áfram með þessum hætti að skapa okkur fullt af góðum færum og stöðum. Við erum að halda þokkalega í boltann og spila flottan leik heilt yfir. Með sigrunum kemur trúin og nú eru tveir í röð, þetta er allt á leiðinni upp á við," sagði Viktor.
