Þýskaland: Fjórða tap Ísaks og Köln á tímabilinu

Ísak Bergmann Jóhannesson kom við sögu hjá Köln sem tapaði 2-1 fyrir Bayer Leverkusen í þýsku deildinni í dag.

Miðjumaðurinn byrjaði á bekknum hjá Köln sem lenti undir strax á sjöundu mínútu þegar spænski miðjumaðurinn Aleix Garcia skoraði glæsilegt mark beint úr aukaspyrnu.

Ísak kom inn af bekknum á 75. mínútu, en tíu mínútum síðar tvöfaldaði tékkneski framherjinn Patrik Schick forystu Leverkusen.

El Mala-bræðurnir sáu hins vegar til þess að Köln ætti enn möguleika undir lokin. Malek átti þá frábæra fyrirgjöf frá hægri inn á teiginn þar sem Said kom á ferðinni og þrumaði boltanum í netið.

Lengra komst Köln þó ekki og Leverkusen fagnaði 2-1 sigri.

Leverkusen situr í fimmta sæti deildarinnar með 16 stig, en Köln er í fimmtánda sæti með níu stig.