England: Jafnt í fjörugum föstudagsleik

Það fór fram mjög fjörugur leikur í ensku úrvalsdeildinni í kvöld en spilað var á St. James' Park í Newcastle.

Fyrsti leikur umferðarinnar olli engum vonbrigðum en honum lauk þó með 1-1 jafntefli er Leeds kom í heimsókn.

Raphinha kom Leeds yfir á 15. mínútu en hann átti þá fyrirgjöf sem endaði í marki Newcastle eftir skemmtilega hreyfingu Rodrigo.

Besti maður vallarins í kvöld var Allan Saint-Maximin hjá Newcastle og tókst honum að jafna metin á 44. mínútu með góðu skoti innan teigs.

Saint-Maximin fékk boltann á fínum stað og fíflaði varnarmenn Leeds áður en hann þrumaði knettinum í netið.

Bæði lið fengu svo sannarlega tækifærin til að bæta við en mörkin urðu ekki fleiri og jafntefli niðurstaðan í þó skemmtilegum leik.