Mikel Arteta, stjóri Arsenal, var mjög sáttur með sína menn í kvöld þrátt fyrir 1-0 tap gegn Manchester City á Etihad vellinum í Manchester-borg.
Arteta og hans menn töpuðu með einu marki gegn engu í ensku úrvalsdeildinni og gerðu mun betur en í júní þegar leikar töpuðust 3-0 í sömu viðureign.
Arteta þekkir vel til Man City og var aðstoðarmaður Pep Guardiola þar í fjögur ár. Hann var virkilega ánægður með frammistöðu kvöldsins.
„Þetta voru tveir algjörlega mismunandi leikir. Þá misstum við meidda leikmenn af velli á fyrstu 15 mínútunum og spiluðum 45 mínútur með tíu menn. Ég vil tala um það sem við gerðum í kvöld. Ef við þurfum að tapa leikjum, gerum það þá svona,"sagði Arteta.
„Við vitum að allt þarf að vera fullkomið í báðum vítateigum gegn þeim. Ég verð að segja að við erum komnir langt á veg."
„Ég var í þessum búningsklefa Manchester City í fjögur ár og ég veit hvað það er erfitt fyrir lið að gera það sem við gerðum í kvöld."
Athugasemdir