Líkleg byrjunarlið Liverpool og Man Utd

Leikurinn verður flautaður á klukkan 16:30 og sýndur beint á sportstöð Símans.

Heimamenn í Liverpool eru án Dejan Lovren, Nathaniel Clyne, Naby Keita og James Milner vegna meiðsla. Fabinho og Joel Matip eru tæpir.

Gestirnir frá Manchester eru án Axel Tuanzebe, Scott McTominay og Paul Pogba. Þá eru varnarmennirnir Eric Bailly, Timothy Fosu-Mensah, Marcos Rojo og Luke Shaw tæpir auk Marcus Rashford, sem gæti þurft að vera sprautaður með verkjalyfjum til að ná leiknum.

Liverpool hefur unnið alla deildarleiki sína á tímabilinu hingað til nema einn, 1-1 jafntefli við Man Utd á Old Trafford.

Liverpool trónir því á toppi deildarinnar, með 14 stiga forystu á Manchester City og leik til góða. Man Utd er í fimmta sæti, fimm stigum frá Meistaradeildarsæti.

Guardian stillir upp líklegum byrjunarliðum þessara liða og býst við að hinir tæpu Joel Matip og Fabinho verði í byrjunarliði Liverpool. Þá er spáð því að ungstirnið Mason Greenwood byrji á bekknum.

Jesse Lingard og Daniel James munu byrja ásamt Anthony Martial og Marcus Rashford í sóknarlínunni. Nemanja Matic byrjar þá við hlið Fred á miðjunni.