Sverrir sagður á leið í FH

Sóknarmaðurinn Sverrir Páll Hjaltested mun ganga í raðir FH í dag en þetta segir Kristján Óli Sigurðsson í Þungavigtinni á X samfélagsmiðlinum.

Sverrir er án félags eftir að hafa yfirgefið ÍBV að síðasta tímabili loknu. Hann skoraði sex mörk og lagði upp eitt í 14 byrjunarliðsleikjum í Bestu deildinni í fyrra.

Hann er 25 ára og hefur spilað með Val, Kórdrengjum, Völsungi og ÍBV hér á landi en er uppalinn hjá Víkingi. Hann var á mála hjá Tromsö í Noregi á árunum 2016-18.

Sverrir var einnig orðaður við Fram og Þrótt en virðist á leið í Kaplakrika.