Franski sóknarmaðurinn Antoine Griezmann spilaði sinn síðasta heimaleik með spænska liðinu Atlético Madríd í gær og kvaddi hann með sögulegri stoðsendingu.
Griezmann er markahæsti og einn besti leikmaður í sögu Atlético Madríd.
Hann hefur borið liðið á herðum sér í langan tíma en hann mun kveðja eftir tímabilið og halda til Orlando City í MLS-deildinni í Bandaríkjunum í sumar.
Frakkinn, sem er 35 ára gamall, spilaði síðasta heimaleikinn gegn Girona í gær og lagði upp sigurmarkið fyrir Ademola Lookman eftir aðeins tuttugu mínútna leik.
Það var 100. stoðsending Griezmann og það í 500. leiknum fyrir félagið, en hann er aðeins sá þriðji til þess að ná þeim áfanga á eftir Jan Oblak og Koke.
Ofan á það er hann með 212 mörk fyrir félagið í öllum keppnum, 53 mörkum á undan Luis Aragones sem hélt metinu í tæp 50 ár áður en Griezmann tók það af honum.
