England: Chelsea vann Tottenham sem gæti fallið á sunnudag

Chelsea og Tottenham áttust við í gríðarlega mikilvægum Lundúnarslag í ensku úrvalsdeildinni í kvöld og var Chelsea sterkara liðið í bragðdaufum fyrri hálfleik.

Enzo Fernández náði forystunni fyrir heimamenn með laglegu skoti af um 30 metra færi þar sem hann lagði boltann snyrtilega í hornið. Antonín Kinský var mjög lengi að skutla sér og náði ekki til boltans.

Síðari hálfleikurinn var talsvert líflegri heldur en sá fyrri og voru gestirnir sterkari aðilinn. Þeir komust í góðar stöður og sköpuðu fín færi en fengu mark í bakið þegar Andrey Santos skoraði eftir frábærlega útfærða sókn heimamanna í Chelsea sem unnu boltann hátt á vellinum eftir afar slæma sendingu Randal Kolo Muani.

Santos skoraði á 67. mínútu og náði samlandi hans Richarlison að minnka muninn sjö mínútum síðar, en hvorugur þeirra var valinn í brasilíska landsliðshópinn sem fer á HM frekar en Joao Pedro besti leikmaður Chelsea á tímabilinu.

Richarlison skoraði eftir frábæra hælsendingu frá Pape Matar Sarr eftir að Tottenham vann boltann hátt uppi á vellinum þökk sé slæmri skallasendingu frá Marc Cucurella.

Tottenham sótti af krafti og fékk góð færi á lokakafla leiksins en tókst ekki að skora. Lærlingar Roberto De Zerbi vildu fá dæmda vítaspyrnu þegar Marc Cucurella togaði Micky van de Ven til jarðar í hornspyrnu en fengu ekki. Cucurella fékk að líta gula spjaldið fyrir brotið en ekki hægt að dæma vítaspyrnu þar sem boltinn var ekki í leik þegar atvikið átti sér stað.

Tottenham tókst ekki að gera jöfnunarmark svo lokatölur urðu 2-1 fyrir Chelsea.

Þetta eru afar dýrmæt stig fyrir Chelsea sem lyftir sér upp í áttunda sæti úrvalsdeildarinnar sem gefur þátttökurétt í Sambandsdeildina næsta haust. Liðið á enn möguleika á að næla sér í Evrópudeildarsæti með sigri gegn Sunderland í lokaumferð deildartímabilsins.

Tottenham gat bjargað sér frá falli úr deildinni með jafntefli á Stamford Bridge í kvöld en er enn í fallhættu þegar lokaumferðina ber að garði.

Spurs tekur á móti Everton í lokaumferðinni og nægir jafntefli til að bjarga sæti sínu í deild þeirra bestu. Tap þýðir að West Ham fær tækifæri til að bjarga sínu sæti í deildinni og fella nágranna sína í leiðinni.