Rodri hafði aðra valmöguleika

Þrítugur Rodri gerði fjögurra ára samning og segist hafa hafnað öðrum tilboðum til að skrifa undir hjá Barca. Hann hafnaði nýju samningstilboði frá Man City og er talinn hafa hafnað tækifærinu að ganga til liðs við Real Madrid.

„Það voru aðrir valmöguleikar í stöðunni en Barcelona var í fyrsta sæti hjá mér, ég lét alla aðila vita af því strax í upphafi viðræðna. Líkt og ég hef gert allan ferilinn tek ég þessa ákvörðun út frá íþróttalegum sjónarmiðum. Ég er mjög spenntur að spila undir stjórn Hansi Flick, ég elska leikstílinn hans og tel mig geta bætt minn leik enn frekar undir hans leiðsögn," sagði Rodri eftir undirskriftina.

„Markmiðið er að vinna allar keppnir. Við ætlum að gera allt í okkar valdi til að vinna í Evrópu og á Spáni. Við erum mjög ánægðir. Ég tel Barcelona vera gríðarlega sterkt fótboltafélag sem er að verða sífellt betra og ég hlakka til að vera partur af framtíð þess."

Rodri, sem var besti leikmaður heimsmeistaramótsins í sumar, gekkst undir minniháttar aðgerð á baki en segist vera búinn að jafna sig.

„Ég er í góðu standi og tilbúinn að spila, þessi aðgerð var ekki alvarleg. Ég get vonandi byrjað að æfa og spila sem fyrst, ég fylgi því sem læknateymið segir og því sem Hansi vill gera."

Rodri er af mörgum talinn vera besti miðjumaður heims og hefur oft verið líkt við Sergio Busquets, goðsagnakenndan fyrrum miðjumann Barcelona og spænska landsliðsins sem starfar í dag sem aðstoðarþjálfari varaliðs Barca.

„Sergio Busquets hefur alltaf verið fyrirmynd fyrir mig. Það er mikill heiður þegar fólk ber okkur saman."