Bjarni Ólafur ætlar að halda áfram - Óvíst með Val

Bjarni Ólafur Eiríksson, leikjahæsti leikmaður Vals frá upphafi, ætlar að taka eitt tímabil í viðbót. Hvort það verði í Val mun koma í ljós en Bjarni hefur spilað allan sinn feril með félaginu. Hann er alveg til í að skoða einhver ævintýri.

<i>„Er ekki best að segja sem minnst. Samningurinn minn rennur út eftir tímabilið og við sjáum til hvort ég verði í Val áfram eða færi mig um set. Ég er alveg opinn fyrir öllu,"</i> segir Bjarni.

Hann hefur verið orðaður við Vestra þar sem fjölskylda hans er ættuð og Bjarni Jóhannsson, þjálfari Vestra, vinnur með föður Bjarna. Þá er ÍBV búið að slá á þráðinn og kanna hug hans að koma til Eyja.

<i>„Ég er ekkert að stressa mig þannig lagað. Ég elska ennþá að spila fótbolta og líkaminn er í góðu ástandi. Ég tel að ég hafi eitthvað fram að færa, hvort sem það er í efstu deild eða deildunum þar fyrir neðan. Fyrst maður getur spilað fótbolta og hefur gaman af því er engin ástæða til að hætta. Ég setti skóna aðeins upp í hillu í fyrra og fann þá að ég saknaði þess að æfa,"</i> segir Bjarni.