Besta teymi sem Hareide hafi nokkurn tímann unnið með

En það kemur inn nýr maður í teymið fyrir Sölva Geir Ottesen, sem er að taka við Víkingum. Sölvi hefur að undanförnu séð um föst leikatriði og varnarleik.

Jörundur Áki Sveinsson, yfirmaður fótboltamála hjá KSÍ, segir að það sé mikil ánægja með teymið í kringum landsliðið.

„Þegar Age Hareide - sem er algjörlega magnaður maður - hættir þá segir hann við okkur að teymið sem hann var með hér sé besta teymi sem hann hafi nokkurn tímann verið með," sagði Jörundur Áki.

Hareide er hokinn af reynslu og hafði meðal annars stýr danska og norska landsliðinu áður en hann tók við Íslandi. Hann hafði einnig stýrt stærstu félagsliðum Skandinavíu.

„Allt í kringum starfið okkar er mjög faglegt og það er góður andi í teyminu. Hann ráðlagði okkur að halda í sem flesta. Ég var sammála því vegna þess að mér finnst teymið geggjað. Þegar við fórum í viðræður þá var það lagt á borðið fyrir þjálfarann að við værum mðe þetta teymi en að sjálfsögðu er það þjálfarans að ákveða hvað hann vill gera. Eftir að ég og Davíð settumst niður með Arnari, þá var það klárt mál að hann vildi halda teyminu," sagði Jörundur en allt viðtalið má sjá hér að neðan. Þar talar hann einnig um að sjúkrateymið í kringum liðið sé á heimsmælikvarða.