Benoný Breki Andrésson er búinn að vera frá keppni vegna meiðsla í tæpan mánuð og hefur verið að fylgjast með Stockport County úr stúkunni.
Stockport leikur í þriðju efstu deild enska boltans og vann 4-2 gegn Wigan í dag eftir dramatískar lokamínútur. Liðið er í góðri stöðu í umspilssæti um sæti í Championship deildinni fyrir næstu leiktíð með 56 stig eftir 32 umferðir.
„Ég er búinn að taka gifsið af mér og á að byrja í endurhæfingu á morgun," sagði Benoný í viðtali við Fótbolta.net eftir sigur Stockport.
„Þetta var rosalegur leikur, við fáum sjaldan svona mikið af mörkum í leikjunum okkar. Við byrjuðum ekkert sérlega vel en seinni hálfleikurinn var mjög góður og við kláruðum leikinn almennilega."
Það var nokkuð af Íslendingum á vellinum sem fóru með í fótboltaferð Fótbolta.net og upplifðu þeir frábæra stemningu.
„Stemningin er alltaf mjög góð, sérstaklega þegar við skorum sigurmark seint eins og í dag."
Benoný segir að það sé erfitt að horfa á leikina úr stúkunni því hann langi svo mikið að koma inn til að hafa áhrif, en hann skoraði eitt mark og gaf stoðsendingu í síðustu fjórum leikjunum áður en hann meiddist.
„Maður vill koma inn og hjálpa liðinu að klára svona leiki en ég þarf bara að halda áfram að vera jákvæður. Það tekur á hausinn að vera svona meiddur, sérstaklega þegar þú ert að koma til baka þá tekur það á hausinn að komast aftur í sitt form. Núna tekur bara við smá tími í endurhæfingu."
Athugasemdir
